T A K U R U A N G N A K D I L U A

Oleh : Helmijas Hendra

ONE Sabatini sakali ko iyo tabik suganyo. Indak disangkonya anak kasayangannyo si Udin Maranola sabodoh tu bana. Sabanyak tu urang nan baampoak di lapau Etek Baya, inyo surang se nan taangkuik dek polisi. Padohal manuruik keterangan kawannyo si Boy Katapel jo si Robi Gilelu, nan si Udin ko indak sato bagai baampoak do. Tapi kok minum teh talua inyo iyo sato. 

 
Katiko One Sabatini tibo di Polsek maantakan nasi sarantang untuak makan malam anaknyo, muko si Udin alah bangkak-bangkak, antah dek kanai tangan antah dek laloak di ateah lantai tembok. Udin bagageah manyongsoang katiko polisi mambukak an pintu ngeneak untuk mauluakan rantang nan dibaok mandenyo.

Galang-galangnyo iyo sadang paniang bana dek paruiknyo kosong sajak pagi. Ibo bana ati One Sabatini mancaliak anaknyo. Tapi berangnyo labiah lo pado ibo.

 
“Kan alah One keceak an ka waang baulang-ulang Din, tapi pituah mande ang ko indak waang dangakan juo, kini marasai ang jadinyo. Sasuai jo namo ang ma, maranolah ang” keceak One Sabatini dari baliak jaruji basi manahan tangih

 
“Pituah nan ma One?” tanyo si Udin sabalun bagageah mamasuak an nasi ka muncuangnyo

 
“Pituah nan maa lo nan ang tanyoan, pado hal alah acoak One ulang-ulang” keceak One Sabatini mamburansang

 
“Soalnyo, acoak bana One maagiah pituah. Tiok hari ado se pituah dari One. Nan jarang One maagiah pitih nyo” solang si Udin Maranola pulo

 
“Aa keceak waang?!” ariak One Sabatini naiak pulo suganyo

 
“Indak One. Sori. Udin bagarah nyo. Tapi pituah nan ma mukasuik One ko ha?”

 
“Itu, pituah mamak ang dulu. Takuruang nak..."

 
“O itu” alun salasai mandenyo mangeceak alah dipotongnyo dek si Udin Maranola “Takuruang nak di ateah taimpik nak di lua..”

 
“E yayai. Tabaliak baa lo ko ha”

 
“Onde iyo. Taimpik nan di ateah, takuruang nak di lua”

 
“Naa itunyo. Lai hapa dek ang mah”

 
“Ba lo ka indak One. Udin kan urang Minang mah”

 
“Tapi kan indak waang amalkan. Kok lai ang amalkan indak ka sampai ang ka siko” upek One Sabatini

 Udin tamanuang sabanta. Diiruiknyo teh es babungkuih nan dibaoak an dek onenyo. Sudah tu dijaweaknyo basilambeak. “Papatahnyo lai hapa bana dek Udin mah One. Tapi indak langkoak”

 
“Indak langkoak baa?” tanyo One Sabatini heran “Dari dulu sarupo tu juo nyo nan One tarimo dari inyiak ang”

 
“Mukasuik Udin indak ado juklaknyo, baa Udin ka maoperasionalkannyo” jaweak Udin

 
“Aa keceak ang ko ha? Pakai bahaso awak se lah. Jaan babahaso seminar lo ang lai. Indak mangarati One do” solang One Sabatini

 
“Juklak tu aratinyo petunjuak pelaksanaan, One. Pitunjuak baa caro mangarajokannyo. Sagalo karajo ko harus ado juklaknyo, One. Misalnyo juklak cv duo jari. Lai tahu one urang nan karajonyo cv duo jari?”

 
“Tukang cacak mukasuik ang?”

 
“Iyo, takoak bana dek One mah” sambuik si Udin sambia basandao kakanyangan “CV duo jari tu juklaknyo jaleah, mulo-mulo tantukan dulu sasaran, di ma dompet urang talatak, kok dalam tas sadiokan pisau silet, sudah tu mandakeak, ansua manggeser sangeneak, jago suoak kida, urang talengah ansua mamainkan duo jari, sudah tu baru ....”

 
One Sabatini nan asyik mandanganyo, tibo-tibo inyo tapakiak “Onde Udiiiin, jadi iko ruponyo karajo ang salamo ko”

 
Dek karano kareah bana pakiak One Sabatini, tibo sakali polisi nan manjago di muko sel tu
“Ada apa bu? Apa anak ini kurang ajar sama ibu?” tanyo polisi sambia maliek ka Udin nan alah putiah mukonyo

 
“Oh tidak pak. Bukan begitu. Anakku ini sudah mengaku terus terang dia tak ikut berjudi pak. Dia hanya ikut minum teh telor, pak polisi” jaweak One Sabatini sigap

 
Polisi tu tagalak sambia mancaliak ka Udin “Begitu ya bu. Dia memang tak ikut berjudi, tapi dia bandar. Dalam kantongnya ditemukan semuanya uang taruhan. Anak ibu si Udin Maranola ini sudah mengaku siapa nama teman-temannya. Sekarang mereka sedang dicari polisi. Amanlah tu bu, paling-paling anak ibu ini hanya kena dua sampai tiga tahun. Kalau dia baik...”

 
Alun salasai polisi tu mangeceak, One Sabatani alah maluncua rabah ka lantai. Sibuk polisi di polsek tu sadonyo. Si Udin indak tahu apo nan kadikarajokannyo maliek onenyo tumbang di lantai. [*]

========================>dikutip dari buku 

"MITOS-MITOS MINANGKABAU, PEMBODOHAN GENEREASI SEPANJANG MASA" 

halaman 209-211